شيماء مكي
وجهت حملة "بورسعيد تستحق" رسالة الى كل مواطن بورسعيدي تؤكد فيها على اهمية مشاركة جميع ابناء بورسعيد بكل توجهاتهم واطيافهم في التخطيط لبلدهم حتى تصبح "بورسعيد .. جوهرة مصر بل والعالم" جاء في الرسالة: عزيزي المواطن البورسعيدي:- - لو سيادتك ناشط سياسي ..او حقوقي .. او نقابي .. او ناشط في العمل الاهلي.. - لو سيادتك صاحب حملة او مبادرة او ائتلاف .. - لو سيادتك تنفيذي او شعبي .. - لو سيادتك ثوري او اصلاحي .. - لو سيادتك صغير او كبير .. باختصار: لو سيادتك شايف نفسك من النخبة .. او شايف نفسك مجرد مواطن بورسعيدي بسيط وده طبعا تواضع منك.. يبقى اكيد بتحلم معانا ان بلدنا ترجع تنتعش تاني وان بورسعيد تستحق ان تكون محط انظار الجميع ومحل الاهتمام على المستوى المحلي والاقليمي بل والدولي كمان! يبقى لازم نحدد مع بعض ايه اللي ممكن نعمله على مدار السنة علشان نحقق " حلمنا لبلدنا " ونحدد كمان: ازاي يتعمل ؟ وامتى ؟ وفين بالضبط؟ ومين اللي ها يعمله؟ وها يتصرف عليه كام؟ وايه اللي ها يعود منه على البلد واهلها؟ ومين اللي ها يصرف ؟ ومين المسئول عن المتابعة والتقييم ؟!! الكلام ده كان هوا المقصود لما طرحنا فكرة مسابقة "وضع اجندة سنوية لتسويق بورسعيد :تجاريا وسياحيا وثقافيا وفنيا ورياضيا ....الخ" ومسابقة" افضل الالمبيات" كجزء من مهرجان ليلة شم النسيم الذى يجب وضعه في اجندة بورسعيد بعد تطويره. - - عندك فرصة انك تشارك في مسابقات حملة "بورسعيد تستحق" الخاصة بمهرجان الربيع: تعبر من خلالها عن نفسك او عن الجهة اللي انت بتمثلها.. ولو مش عايز تدخل المسابقة ؟ شارك واطلب استبعادك منها ! المهم انك تشارك بحلمك لبلدك علشان بعد كده هانطرح كل الافكار اللي اتقدمت للمناقشة – في وجودك وبحضور الخبراء والمتخصصين في كل المجالات علشان نخرج بأجندة واحدة تكون شاملة ووافية وتحقق الهدف اللي كلنا بنحلم بيه ان بورسعيد تبقى مش بس جوهرة مصر ! لا .. بل جوهرة العالم كله باذن الله تعالى . وده طبعا ها يعود بالخير على بورسعيد واهلها وها تكون الاجندة دي سبب رئيسي لتطوير بلدنا في جميع المجالات لتناسب احلامنا اللي هانحققها بالفعل مش بالكلام. - لو سمحت : بلاش تخنق حلمك جواك علشان مترجعش تشتكى من ان مفيش حاجة بتتعمل !! او ان مفيش تخطيط صح!! اوان مفيش فايدة!! - ولو مش عاجبك المسئول عن البلد دي او مش عاجبك الناس اللي في الحملة !! معلش اعصر على نفسك لمونة وتعالى على نفسك علشان بلدك! - ابعت لنا حلمك بالطريقة اللي تريحك ..او هاتو معاك ليلة شم النسيم بمعرض الحملة بجوار خضير الخطاط واحنا هانستلموا منك وهانعرضوا كمان باسمك في المعرض. - عزيزي المواطن البورسعيدي : - لان "بورسعيد تستحق" .. ابدأ بنفسك وشاركنا الحلم وخليك فاكر ان : - " بإرادتنا نصنع الحلم .. وبإدارتنا نعيش الحلم " - انتهت الرسالة
اترك تعليقا:
